Inxhi Malo Aliçka

Tiranë, 24 qershor 08

Do të doja të falënderoja me gjithë zemër dhe të vlerësoja lart iniciativën e marrë nga ideatorja e kësaj faqeje, Aurora Allushaj dhe bashkëpunëtorët e saj që po jetësojnë çdo ditë këtë websit, pasi gjithçka që bëhet në emër të Dukatit tonë, asnjëherë nuk është e mjaftueshme, asnjëherë nuk del jashtë kohe dhe asnjëherë nuk mund ta thotë dot thelbësisht se ç’vlerë është vërtetë Dukati ynë. Ndaj, një kontribut i tillë në këtë drejtim, është një gur me peshë në gjerdanin e krijuar nga brezat paraardhës për vendlindjen tonë.

Së pari, më vjen mire që kjo iniciativë merret nga një vajzë e re dukatase qe ka vite e larguar nga ai vend, duke u shpërndarë në shumëllojshmërinë e varianteve dhe mënyrave të të jetuarit nëpër botë. Kjo tregon se jo vetëm brezi më i vjetër, por edhe gjenerata e re, e ka brumosur nektarin e dhënë nga origjina, jo vetëm për të mos harruar secili prej nesh se nga vijmë, por edhe që të risjellim me aq sa mundemi, traditën, vlerat dhe mirënjohjen për kontributin e brezave të mëparshëm në lartësimin e emrit të Dukatit, me punën e tyre, intelektualizmin e tyre, me vendin e merituar që ata kanë krijuar kudo ku kanë shkelur.

Por, pse jo, kjo faqe interneti kushtuar Dukatit, do të na japë mundësinë neve, brezit disi të mesëm t’i tregojmë brezave pasardhës për Dukatin tonë, pasi ne, pavarësisht se sot mund të jemi larg tij, jemi shumë të afërt dhe kemi shumë njohuri mbi jetën e Dukatit, të prindërve tanë apo të gjyshërve e stërgjyshërve tanë, pra në një farë mënyre kemi një lidhje shpirtërore më të theksuar me Dukatin ku kemi lindur. Ne na takon të bëjmë një apel konkret, apo të lemë një gjurmë konkrete në brezat që do të vijnë. E duke mirëkuptuar më shumë se çdokush tjetër vështirësitë e këtij brezi, për shkak të lirshmërisë dhe ndoshta pak indiferencës së tyre të akumuluar nga mënyra e jetesës në një botë moderne, ne na takon t’u përshtatim atyre metodologjinë dhe mënyrën se si do t’u flasim për origjinën e tyre dhe se si duhet t’i bëjmë të ndihen krenar për këtë origjinë.

Mendoj se një web on – line është mënyra më e mirë, më transparente, më e drejtpërdrejtë, për të trokitur te gjeneratat e reja. Sigurisht, nuk është e vetmja.

Shumica e këtij brezi të ri, për ironi të fatit, kanë lindur në vende të ndryshme të botës dhe sigurisht që ndjesia e të qenit dukatas, tek ata duhet ushqyer, për të mos e humbur vazhdueshmërinë e traditës dhe brezave. Dhe, meqenëse, zhvillimi global i ditëve të sotme, tek rinia jonë, vjen i formatuar në fjalën e fundit të teknologjisë, pra në metodën dixhitale të komunikimit, me internet, atëherë kontributi i kësaj faqeje internet behët edhe më i rëndësishëm. Aksesi informatik do t’i ndihmojë ata të shuajnë kuriozitetin e të lexojnë më tepër për Dukatin tonë. Do t’i bëjë ata jo vetëm të jenë me kombësi shqiptare, ta quajnë vetën dukatas, por të ndihen thellësisht brenda tyre si të tillë, në zakone, traditë e krenari.

Duke theksuar këtë aspekt, aspak nuk dua të mohoj vlerat e pashtershme krijuese të shumë e shumë intelektualëve dukatas, përmes veprave letrare të shkruara prej tyre, përmes shkrimeve të ndryshme, përmes fjalës së tyre me peshë, kudo ku ata janë, përmes organizimeve të ndryshme në shoqata e të tjera grupime. Përkundrazi, do të dëshiroja që në këtë faqe interneti të përfshiheshin shumë e shumë prej këtyre krijimeve, librave, titujve, emrave, etj, apo informacion mbi gjithçka të bërë nga dora e mendja e ndritur e tyre. Kjo pasuri, që mban vulën e tyre, do të ishte një bazë shumë e sigurt edhe në suksesin e asaj çka synon kjo faqe.

Së dyti, jam e bindur se kjo faqe do të na japë të gjithë ne dukatasve mundësinë të shprehim diçka më shumë për fshatin tonë, na jep mundësinë të rikujtojmë fëmijërinë, por edhe shumë çaste të tjera tonat pranë njerëzve më të dashur, me të cilët sot jemi larg. Do të na japë mundësinë të shprehim mirënjohjen për ata njerëz që ndoshta s’kemi mundur t’ua themi këtë gjë në sy, për njëmijë e një arsye objektive, por më tepër për shkak se jeta na ka larguar fizikisht nga ai vend.

Gjithashtu, do të doja që kjo faqe interneti të ishte edhe një zë i fuqishëm, i konsoliduar, i mirë argumentuar, profesional dhe i bazuar mbi informacion të saktë, mbi çdo nevojë apo problematikë mbi Dukatin. Pra, zëri kritik ndaj të gjitha instancave politike, shoqërore, sociale e kulturore, nuk duhet të reshtë dhe mungojë asnjë herë në këtë faqe, sa herë që Dukati të ketë nevojë për këtë gjë.

Në këtë sipërmarrje shumë të përgjegjshme dhe një sfide shumë të madhe të Aurorës, shpreh bindjen dhe besimin e madh se do të bashkëngjitet çdo dukatas, pa dallim moshe, arsimimi, profesioni, apo vendi ku jetojnë sot nëpër botë dukatas. Duke menduar se shpreh të njëjtin mendim me ta, do të nënvizoja se në nisma të tilla, të lira, jashtë çdo lloj paragjykimi, ka vend për të gjithë. Madje edhe për këdo vlonjate, lab a më gjerë, për çdo shqiptar.

Edhe njëherë, suksese dhe inkurajim në rrugën e nisur, duke i premtuar Aurorës, mikeshës sime shumë të mirë, se do të ketë gjithë mbështetjen dhe ndihmën time në çdo aspekt!

Punë të mbarë!